SINRILIK BUTTA SALEWANGAN

Oleh: Badaruddin Karaeng Latte

Bismillah kupappakarammula ri singrilik

Kesok-kesok sumangak kupakjari passappik

Kubesoki antama ri tangngana atingku

Nampa kupasulu akrupa lampangkana butta marusu

Kusakbuki ri ulu kana  pappakalakbiri

Kupinawangngi doangngang lalang ati

Kelong singrilikku pakkasarangna pangngaingku

Kuminasa assirengreng pangngainna sikuntu tu makbuttayya ri marusu

Iyami anne batara nitangaraka butta salewangang

Tu pangrita angjagai lalang pangngajarrang

Nakiaksamaturu ampaentengi ri pangngadakkang

Akrurung- rurung ampannangnungangi ri kabajikang

Butta marusu labbui ri lampangkana

Napattimboi adak ri simemanganna

Riolopa tu makbuttayya ri marusu nanabolik pammateingna

Ri pattotorang bate kaniakkanna

Labbimi tallu sakbu taung lebba laloa

Siwaktungnaja lebbak tallangna ummakna nakbi nuhu

Nataksiaksiarakmi mange risibatu lino lampana ummak salamaka

Nakaboneang tommo rupa tau pakrasanganga ri marusu

Manna poleng bellami ri pattaungang

Kupakjari tongji bukuang kana soksorang

Kualle kupare singara  pappilajarang

Nakuasoro sumangak patturioloang

Nakusakbukmi poleng uru rupatau ri butta marusu

Kutoktorang bate tallasakna ri sijaina leang

Tojengi ampaentengi tinggina bate kaniakkangna

Kicinikmi ri bate-bate limangna

Naangnarrusukmi tallasakna tu makbuttayya ri Marusu

Napilak jai rekengang pangjariangna

Salewangang tommi ri empoang sukku

Sukkuru mange ri karaeng appakjaria

Mingka niak sekre waktu narokok  angja

Iyami ri pammungbangna kella-kellayya  ri tangngana pikkirangna ttumakbuttayyana

Naapaji kaaksicinik olok-olokmi parangna rupataua

Naaksikangre juku rikalekbakangna

Siaktik jekne mata ri tangngana singrilikku

Aktakmasak  ri langtang pakmaikku

Kupakjarimi pakpasang ri kalengku

Kupadongko ri pangdallekangku

Kusambungmi ammoter bukuang kana belo-belona katallassang

Lebbak sarengna memang  pakkalinoang

Kaiaji tallasaka rekangang paksulu angtamanaji nappasakta

Kaiaji linoa pakteteangnaji lampangkanangta

Naniakmo sekre wattu naakturungmi  bosi tuju allo tuju bangngi

Angngerang kilak aksirengreng rengreng gunturu

Risiwaktu simbarakna naammumba tommi sekre rupatau

Iyami niarenga tu manurung karaeng loe ri pakere

Nipakarangmulaimi toktorangna tu manurung

Nikanai tumanurung kataena niranpei riassala kabattuang

Naijiya angngerangi tangra kalompoang

Nabattumi tujaiaya assamaturu ampakjari somba

Kalangngerangmi ri butta maraeng

Nirampe  golla na kaluku ri lalang gaukang

Nabattu tongmo ri tolingna  sombayya ri gowa mangkau ri bone Karaeng polong bangkeng Karaeng loe ri bajeng

Naniareng tommi butta marusu nutta salewangang

Ammentengmi butta marusu akjari sekre Batara kakaraengang

Assamaturu ri taksekrea gaukang

Nisusung akjari angrong pangngadakkang

Pakpalewa ri pakkalinoang

Nasiapamo sallona kakaraenganga ri marusu

Assitangro tangro pakmaik battu ri gowa sanggengna butta luwu

Assirimpung lalang paksaribaktangngang

Assipakassa Angngerang kalompoang

Nanikmao tommo sekre waktu ri niakna balangdayya

Angngerang danggangang na maraeng lalangnganna

Jai pakkasakna na nibalii ri balanda leklenga matanna

Iyami uruna ampaksitappuk tappuki paksaribaktangnganga

Apami kakajariangmi bundu Lompoa ri Gowa

Siapa sallona nanibetami gowa lalang bundukna

Nitadok ri lalang  cappayya ri bungayya

Narontak tommi poleng sikuntu Batarayya

Naijiiya anak anak karaenga ri gowa

Taena naerok ni  bawang bawangngang nipakjari ata

Napilarimi pakrasanganga akboya pakrasangang beru

Najai tongmi ampaenteng kakaraengang ri rampikna kakaraenga ri marusu

Anak Karaeng nirurungang tu barani

Aklapara pacce ampaenteng sirik

Aklamung  sikuntu gauk bajik

Angjarimi assiampi ampik sipakatau sipakainga sipakalakbirik

Nanikmo poleng sekre waktu ri tinggina adaka

Sikuntu karaenga ammempo sipatangarri lalang gauk adak

Iyami bicarangna ri paksereangna tumakbuttayya

Iyatommi akjari bibik pattimboangna toddok limayya ri marusu lebbok tengngae siagang gallarrang appaka

Naiji nikanangi toddok limayya ka limai sipammentengang

Marusu Tanralili  bontoa Turikale Simbang

Iyamianne appakarammula appaengteng pakrimpungan

Gaukang paksekre-sekreang

Iyami nikangngi lebbok tengngae kaniaki ri tangnga bulu

Paksereangna Pitu bila bila

Cenrana Camba Mallawa Labuaja Gattareng Matinggi balocci na Wanua Waru

Butta Bone pakbabambana irayanganna

Iyami nikanangi gallarrang appaka ka appaki sipangnaggallang

Butta Gowa pakbambana ri biring timborang

Bira Moncongloe Biringkanayya sudiang

Aksekre ri sikko puli takalapaksang

Nagannakmi tallu rupanna paksekreang  ri Butta Marusu assiampi ampi

Assikapaccei assipassiriki

Naiyami Anne nitangara tallu tanra ri marusu

Akjari paksala sukku pakjariangna Butta marusu

Nalangri maradekanamo Indonesia

Nanakjari tommi tallu tanra ri marusu sekre kabupaten

Iyami nikananga kabupaten Maros

Nanipaenteng poleng pattangarrang Butta salewangan

Sikammami anne bodo- bodona singrilikku

Iyamianne bannang kebokna pakrasanganga ri marusu

Kupasangi risikuntu tumakbuttayya ri marusu

Teaki ero takkaluppa bella dudu

Salamakki para salamak

Butta Salewangan, 16 November 2021